Bahari kasitu pang kami mandian
Diyang Galoh batatapasan
Papagian ari hudah baurang
Batajak tihang kayu ramuan pirut pirut
Balantai paring babalah dua
Jarang jarang
Bagagamat amun bajalan luko tabarusuk
Panjang parak sabalah malintang sungai
Takuliling banta mambari takutan
Punggur ara tuha ganal di higa nya
Basangkutan cuntang, cicibukan hagan bakubui
Disasala lubang basumpal burus awan sabun
Hagan mandi
Hagan tatapasan
Mancarunung banyunya amun pasang
Bahari kasitu pang kami patang2
Maunjun patung, saluang kacapisan
Sasakali taulihi lundu awan sangiringan
Higa mahiga parupuk liut liut ditampur angin
Babunyi rami amun sunyi
Ludus jalannya hagan kalaluan
Tungkaran
Naung haja disitu
Di bawah rampun ara ganal liar
Bajurai jurai akarnya
Hagan piruhutan kakanakan
Baayun ayun tinggi tajun bacabur
Bahari kada sunyi tungkaran nintu
Barucau haja kukulaan
Barami rami mamandiran
Kuya manguya kahidupan saharian
Hahalolong amun ada Utuh nang cakah banyanyi
Hilum hiluman Diyang mandi bakamban
Bilang asa bagantar bumi
Mangguroh amun timpil lalu
Tungkaran
Banyak haja ganangan kita
Hahanyaran ni aku kasitu
Bailang
Tagah kadada lagi mahantas handak kasitu
Kada baurang lagi… ranai riip
Rupa rupanya
Tungkaran nintu kadada lagi
Mairah98/Msj 1102101300h
