Dugaan Kita
Maristanya Umak ku
Kakarukut sarampun sarampun
Biraran, jariwit, hiring hiring diranjah
Dihantas… di bair salapot tagah napa
Bubujuran baalur narai sarampun sarampun
Patah mata pisau kadul tumpul
Tasundak kayu.. kada licin napa kulit nya
Bakiluk kiluk, batukul tukul gatah tuha
Tatarawan ari talah sapitak
Marista nya Umak ku
Sapitak lagi di hayau
Bamandak satumat di parangan
Managok liur karing rakungan kapanatan
Arini talaju saikit babatis
Utoh halui kada umpat.. dihambin. dikilik
Marinuk guring, kakadang kakacawai kayamukan
Babial bial muha ading... kasian
Marista nya Umak ku
Bapa bagawe marintis kahutan mana kada tahu
Kaitu pang sakali tulak sabulan tuntung
Hagan padaringan kami
Hagan sakolahan kami
Umak bacari
Tasipak banir, tasipak akar hahayuyung handak rabah
Karap banar.. tajajak duri kasusuban dikuit di cabut
Kaitu pang Umak kada bisa bacapal
Bilang tabal kulu talapak batis
Kada uyuh kada paning tabah hati
Kada hiranai urang bahari
Maristanya Umak ku
Napa nang handak diurak
Talah hudah dua pitak dihayau di turih
Sango nasi dingin iwak karing bapajal
Mahingur arum bau nya
Nyaman haja untalan di tandakan
Tatamba parut galurukan
Kopi kosong dingin malapai rakungan
Parak ties hudah gatah ku
Maristanya Umak Ku
Baladi bakuripak gatah di angong
Sarampun sarampun ditunti
Dituang, dipulir limbui paloh babaloi
Matahari mancilarau manyapa muha
Disasala daun daun rindang rampun rajaki
Panuh sabaladik, sapitak lagi
Bilaran inda karing, jariwit manjarinting
Babalar balar batis di sayat hiring hiring
Maristanya Umak ku
Talah diputiki, dua baladi rajaki arini
Takurihing hilum Umak parak tangahari
Mangandar dua baladi rajaki
Ciplak ciplak , riut riut bahu, giul giul awak
Dua parit halui dilampuaei
Di hadapan sauting titi dua batang kayu tuha
Banyu landas pancur kada bakakaringan
Mancarunung jaranih tatamba mata
Taingat handak manciuk malapai rakungan
Kada jadi.. badadas handak bulikan
Taingat anak anak kuciakan kuriikan kalaparan
Bagagamat Umak bajajak….
Papalingau Umak takutan
Prak,, prak ,, titian tuha patah
Tatumpah rihuk bahu nang dikandar dua baladi
Tabalik,tahambur layau papak manyayat hati
Hanyut landas gatah mamutih kada barajaki
Manangis Umak maniring nasib
Uyuh awak uyuh hati
Bilang batingkaung kada kawa lagi
Maristanya Umak Ku
Manganang dugaan silih baganti
Mairah98/Msj 2202100900h
Komen
mai... marista aku mambaca sajakmu. Kaingatan aruwah ayahku gin mutong gatah bahari. Tapik aku kada bisa handak manulis sajak ilah kau, banjarnya 'power'. 
cadangan acara bowling kulaan
Secretariat PBM
Atas 
© 2004-2008 